Vuçiq për vendimin e 16 shtatorit: Thaçi mund të shpallet kryesisht i pafajshëm

Presidenti i Serbisë, Aleksandar Vuçiq, ka folur për 16 shtatorin, datën kur pritet të shpallet aktgjykimi ndaj Hashim Thaçit, Kadri Veselit, Rexhep Selimit dhe Jakup Krasniqit në Hagë.

Vuçiq ka pretenduar se vendimi mund të jetë “kryesisht pafajësues” për ish-krerët e UÇK-së.

“Kam marrë vesh se shpallja e vendimit për Hashim Thaçin është planifikuar për më 16 shtator dhe, me sa kuptoj, ai do të jetë kryesisht një vendim pafajësie”, ka deklaruar Vuçiq.

Ai ka pretenduar gjithashtu se Perëndimi po përpiqet, sipas tij, ta paraqesë Serbinë si palën e vetme përgjegjëse për krimet e luftës.

Vuçiq ka shtuar se, sipas informacioneve që pretendon se posedon, Thaçi mund të dënohet vetëm për akuza më të lehta, ndërsa masa e dënimit mund të përkojë me kohën që ai tashmë ka kaluar në paraburgim.

Deklaratat e presidentit serb mbeten pretendime të tij, ndërsa vendimi përfundimtar i takon trupit gjykues në Hagë.