Zotohet Shukri Buja: Do të rriten standardet e ndërtimit në Lipjan, do të rrisim sigurinë e punëtorëve

Kandidati i Partisë Demokratike të Kosovës, Shukri Buja, në shoqërinë e pronarit të kompanisë “M.Gashi ShPK”, Mustaf Gashi, kanë vizituar vendpunishtet ku po krijohet zhvillimi i së ardhmes në Kompleksin “Grand Tower”, “Prishtina e Re”.

Buja vlerësoi lart këtë zhvillim, duke theksuar kontributin në mirëqenien e shumë familjeve në Lipjan si rrjedhojë e punësimeve.

“Sot, së bashku me Mustaf Gashin, pronari i kompanisë M.Gashi ShPK, pronarin e një prej kompanive më të mëdha të ndërtimit në Lipjan e Kosovë, vizituam vendpunishtet ku po krijohet zhvillimi i së ardhmes në Kompleksin Grand Tower, Prishtina e Re. Ky biznes është shembull i zhvillimit në vendin tonë. Me punësimin e një numri të madh punëtorësh nga Lipjani, ai siguron jo vetëm vende pune, por edhe mirëqenien e shumë familjeve lipjanase”, tha ai.

Buja gjithashtu tregoi zotimin e tij, ku tha se: hartat zonale do të rishikohen në konsultim të hapur me sektorin privat; nuk do të ketë ndërhyrje politike në punën e sektorit; do të fuqizohet stafi profesional komunal për t’i shërbyer më mirë palëve.

Por mbi të gjitha ndërtimi në Lipjan do të zhvillohet dhe do të rriten standardet, do të promovohen të drejtat e punëtorëve në këtë sektor, sidomos siguria dhe shëndeti në punë, si dhe do të kërkojmë banim të përballueshëm dhe të qëndrueshëm për qytetarët tanë. Ky është ndryshimi që e meritojnë punëtorët, bizneset, si dhe çdo qytetar i komunës sonë”.