Sekretari i PDK-së, Betim Gjoshi , i ka reaguar Komisioneres së Bashkimit Evropian për Zgjerim, Marta Kos, e cila ka thënë se Ligji i ri për Specialen është i papranishëm.
Ai e ka ftuar zyrtaren evropiane që ta lexojë ligjin në fjalë për ta kuptuar.
Në profilin e tij në Facebook, Gjoshi ka shkruar pse ligji është i drejtë.
“Zonja Kos, Së pari, lexojeni ligjin e miratuar në Kuvendin e Republikës së Kosovës, në mënyrë që të kuptoni përmbajtjen e tij. Së dyti, në asnjë pikë të vetme Ligji nuk e cenon pavarësinë e gjyqësorit. Nëse do ta lexonit do ta kuptoni këtë. Së treti, Kosova i ka besuar dhe gjyqtarët kanë abuzuar me Ligjin që ishte i miratuar nga Kuvendi i Kosovës, duke kaluar në arbitraritet, saqë Dhomat e Specializuara vetëm gjykatë s’mund të quheshin. Ato i ngjanin kohërave të errëta nëpër të cilat ka kaluar Europa”, ka shkruar ai, duke dhënë detaje tjera.
“Së katërti, pikërisht për të mos përsëritur një kohë të rëndë për europianët, ju do të duhej që kritikat t’i adresonit rreth kësaj Gjykate e cila nuk ka përdorur asnjë lloj standardi europian të drejtësisë dhe që prej 6 vitesh i mban në paraburgim ish-drejtuesit e UÇK-së pa fakte dhe pa dëshmi që ndërlidhet me ta. Së fundmi, Ligji është miratuar nga më shumë se 3/4 e deputetëve të Kuvendit të Kosovës – dëshmi e mbështetjes së gjerë politike e qytetare dhe ju duhet ta respektoni atë”, ka shkruar ai.
