Rreth 77 kamionë me afërsisht 800 tonë ndihma humanitare kanë hyrë në Gaza gjatë ditëve të fundit.
Megjithatë, kreu i Rrjetit të OJQ-ve Palestineze, Rafaat al-Majdalawi, tha se ndihmat që po arrijnë në enklavë mbulojnë vetëm 20 deri në 30 për qind të nevojave bazë të popullsisë, shkruan Al Jazeera, përcjell Sinjali.
Sipas tij, Gaza po përballet me një situatë të rëndë humanitare për shkak të kufizimeve të mëdha ndaj hyrjes së ndihmave.
Al-Majdalawi tha se rreth 30 për qind e kamionëve që hyjnë në Gaza janë të destinuar për sektorin privat, ndërsa çdo ditë hyjnë vetëm 60 deri në 80 kamionë me ushqime dhe materiale për strehim.
Ndërkohë, përmes pikëkalimit Rafah janë evakuuar 25 pacientë dhe 32 shoqërues për trajtim mjekësor jashtë Rripit të Gazës. Evakuimi është realizuar në koordinim me Organizatën Botërore të Shëndetësisë (OBSH).
