Një ndryshim i ligjit pritet të prezantohet në kuadër të takimit qeveritar në janar. Koalicioni po ashtu po përgatit një strategji të përbashkët industriale.
Kancelari federal Christian Stocker nuk dëshiron të tolerojë zbatimin e sheriatit, rendit juridik islam, në Austri. Me një ndryshim të ligjit synohet të krijohet qartësi, transmeton Periskopi.
“Në kundërshtim me vlerat tona”
Zbatimi i sheriatit në Austri ka shkaktuar disa herë shqetësime dhe reagime në të kaluarën. Kancelari federal Christian Stocker e konsideron të nevojshme të dërgohet një sinjal i qartë në këtë drejtim, edhe pse në rastet konkrete nuk ka pasur kundërshtime me rendin juridik vendas. “Si politikan, nuk jam i gatshëm të pranoj që në Austri të ketë fuqi sheriati, një rend juridik për një shtet teokratik, i cili është në kundërshtim me vlerat tona, qoftë edhe vetëm në dispozita të veçanta”, kishte deklaruar Stocker në një intervistë për STANDARD . ÖVP ka njoftuar se synon t’i vendosë “përfundimisht fre” zbatimit të rregullave të sheriatit në Austri. Për fushatën e saj kundër myslimanëve, ÖVP ka marrë ditët e fundit kritika të ashpra, edhe nga partnerët e koalicionit, por megjithatë dëshiron t’i qëndrojë besnike linjës së saj.
