Mojtaba Khamenei, djali i Udhëheqësit Suprem të Iranit, Ajatollah Ali Khamenei, dhe një figurë që prej kohësh është parë nga disa analistë si një pasardhës i mundshëm, është raportuar i gjallë nga agjencia iraniane e lajmeve Mehr.
“Mojtaba Khamenei, djali i Udhëheqësit Suprem, është plotësisht i shëndetshëm”, raporton agjencia Mehr, citon CNN.
Mediumi shtoi se Mojtaba po shqyrton gjithashtu “çështje të rëndësishme” që lidhen me vendin, pa dhënë detaje.
Mojtaba, djali i dytë i Udhëheqësit Suprem, njihet si dikush që ushtron ndikim prapa skenave, me lidhje të thella me Trupat e Gardës Revolucionare Islamike (IRGC), forcën ushtarake më të fuqishme në Iran, si dhe Basij, rrjetin e saj vullnetar paramilitar, transmeton Express.
Megjithatë, çdo lëvizje drejt një trashëgimie nga babai te djali do të përplasej me ndjeshmëritë politike dhe fetare brenda Iranit. Transferimi i pushtetit në stilin dinastik nuk shihet me sy të mirë brenda traditës klerikale shiite, dhe veçanërisht në një sistem të lindur nga një revolucion që rrëzoi një monarki.
Ekzistojnë edhe pengesa praktike: Mojtaba nuk njihet gjerësisht si një klerik i rangut të lartë dhe nuk mban asnjë pozicion zyrtar qeveritar. Ai u sanksionua nga Shtetet e Bashkuara në vitin 2019./Express
