Ky shtet ndalon punën fizike gjatë ditës për shkak të të nxehtit ekstrem

Autoritetet greke kanë urdhëruar pushime të detyrueshme nga puna në disa rajone të vendit, për shkak të një vale të nxehti ekstrem që ka përfshirë Greqinë që nga e diela dhe pritet të zgjasë deri të enjten .

Ministria e Punës ndaloi punën fizike në ambiente të jashtme dhe shpërndarjen e ushqimit nga ora 12:00 deri në 17:00, në zonat ku temperaturat pritet të kalojnë 40°C. Masa do të zbatohet kryesisht në Greqinë qendrore dhe disa ishuj.

Punëdhënësve u është kërkuar gjithashtu të ofrojnë mundësi për punë nga distanca, kurdo që të jetë e mundur.

Ndërkohë, në Athinë nuk janë ndërmarrë masa emergjente pasi temperatura aktuale nuk konsiderohet e pazakontë për këtë periudhë.

Meteorologët presin kulmin e të nxehtit të martën dhe të mërkurën, me një rënie të lehtë të temperaturave drejt fundit të javës.