Reshjet e dendura të dëborës që kanë përfshirë Bosnjën dhe Hercegovinën gjatë 24 orëve të fundit kanë shkaktuar probleme të mëdha në të gjithë vendin, ndërsa një aksident me fatalitet është regjistruar edhe në Sarajevë.
Në lagjen Gërbavica të Sarajevës, një pishë me lartësi më shumë se dhjetë metra ra mbi një grua, e cila vdiq në Klinikën e Mjekësisë Emergjente (EMC) për shkak të lëndimeve të rënda.
Bora ka shkaktuar probleme serioze në trafik, me një numër të madh aksidentesh rrugore të regjistruara, si dhe ndërprerje dhe reduktime në transportin publik.
Qytetarët janë ankuar për rrugë dhe trotuare të papastra dhe të pakalueshme, për shkak të të cilave shumë prej tyre janë detyruar të lëvizin në rrugë, duke rrezikuar edhe më tej sigurinë e këmbësorëve.
Ndërmarrja komunale “Rad”, e cila vepron në territorin e katër komunave urbane të Sarajevës, njoftoi se 33 automjete shërbimi dimëror dhe rreth 80 punëtorë janë angazhuar në terren për pastrimin manual të rrugëve dhe zonave për këmbësorë.
Megjithatë, një numër i madh rrugësh dytësore dhe hyrjesh vazhdojnë të mbeten nën dëborë.
Edhe pse bora pushoi së reshuri në Sarajevë gjatë natës, orët e mëngjesit sollën vështirësi shtesë për shkak të akullit.