Pas mbylljes së vendvotimeve, VLEN-i pret fitore pa balotazh në Çair, Tetovë e Saraj

Pas mbylljes së vendvotimeve për zgjedhjet lokale në Maqedoni të Veriut, VLEN-i i ka falënderuar qytetarët që morën pjesë në votim, ku thanë se të njëjtit kanë dëshmuat vetëdije të lartë demokratike.

Në një konferencë për media, zëdhënësi i VLEN-it, Driton Sulejmani tha se presin fitore në pothuajse të gjitha komunat, teksa sipas tyre, në komunën e Çairit, Tetovës dhe Sarajit fitorja mund të arrihet që në rundin e parë.

“Nga gjithë informacioni që kemi marrë presim fitore në pothuajse secilën komunë. Jemi optimist se në disa komuna gara do të përmbyllet që në rundin e parë. Kjo mendoj se vlen për komunën e Çairit ku presim fitore në rundin e parë”.

“Jemi afër fitores edhe në Tetovë në rundin e parë. Njëjtë e presim edhe në komunën Sarajit. Për momentin këto janë informatat”.

“Në komunën e Çairit dhe Sarajit kemi një rritje dukshëm më të madhe se në zgjedhjet e kaluara lokale. Sipas nesh kjo paraqet një rritje të përkrahjes dhe përqafim të ndryshimit për këto komuna si rezultat i politikave të mira që VLEN-i ka arritur t’i bëjë në 15 muaj qeverisje”, tha Sulejmani, njofton Klankosova.tv.

Tutje, VLEN-i tha se presin nga Komisioni Shtetëror i Zgjedhjeve që faza e përmbylljes së numërimit të votave të zhvillohet me transparencë të plotë, saktësi dhe profesionalizëm.

“VLEN mbetet e përkushtuar ndaj zgjedhjeve të ndershme dhe respektimit ndaj çdo vote. Ne besojmë se dita e sotme është dëshmi se qytetarët duan stabilitet, punë dhe përgjegjësi. Dhe këtë mesazh do ta lexojmë me përulësi ndaj vullnetit të tyre”, u tha në konferencë.