Përhapet një variant i ri i koronavirusit: Gjermania regjistron rritje të rasteve të reja

Në Gjermani është vërejtur një rritje e numrit të rasteve të infektimit me koronavirus. Sipas të dhënave më të fundit të Institutit Robert Koch (RKI), gjatë javës së 37-të të vitit 2025 janë regjistruar 2,396 infeksione të reja, një rritje në krahasim me 2,153 rastet e javës së mëparshme.

Ky trend në rritje ka nisur që nga fundi i gushtit dhe pritet të vazhdojë deri në fund të shtatorit.

Gjithashtu, rritet edhe numri i infeksioneve akute të frymëmarrjes në të gjitha grupmoshat. Megjithatë, ndërsa ka më shumë njerëz që kërkojnë ndihmë për simptoma të lehta, rastet serioze që kërkojnë trajtim në spital mbeten të pakta. Kjo tregon se infeksioni po përhapet, por nuk ka ende një epidemi të përhapur masivisht, sipas revistës Fenix.

Variant i ri “Stratus” dominon

Një variant i ri i virusit, i quajtur XFG ose “Stratus”, është përgjegjës për shumicën e infeksioneve të reja. RKI raporton se ky variant është identifikuar në 84% të mostrave të analizuar dhe aktualisht është më i përhapuri në Gjermani. Për krahasim, në javët e 32-të dhe 33-të ishte prezente në 65% të rasteve. OBSH vlerëson se “Stratus” është më ngjitës, por nuk ka treguar se shkakton sëmundje më të rënda.

Përveç koronavirusit, po qarkullojnë edhe viruse të tjera si rinoviruset dhe parainfluenza, duke u kujtuar për mënyrën tipike të përhapjes së infeksioneve respiratore pas periudhës së pushimeve verore.

Koment nga eksperti

Mjeku dhe gazetari mjekësor Christoph Specht thekson se kjo situatë është e pritshme. “Koronavirusi ka ardhur për të qëndruar dhe do të jetë pjesë e jetës sonë për një kohë të gjatë,” tha ai për mediat gjermane. Rritja e rasteve në shtator është normale pasi moti ftohet dhe njerëzit kalojnë më shumë kohë brenda, duke favorizuar përhapjen e virusit.

Specht thekson gjithashtu se situata aktuale nuk ngjan me vitet e para të pandemisë: “Imuniteti ynë është më i fortë tani, dhe simptomat që po shihen janë kryesisht të lehta, si ngjirje zëri dhe dhimbje fyti, tipike për një ftohje të zakonshme.”

Sistemi shëndetësor dhe masa paraprake

Edhe pse spitalet dhe mjekët nuk kanë raportuar një rritje të ndjeshme të pacientëve me COVID-19, ekspertët paralajmërojnë se numri i rasteve mund të rritet në javët në vijim, sidomos nëse përkojnë sezonet e gripit, RSV dhe COVID-19.

Për të gjithë, veçanërisht për grupet me rrezik më të lartë, rekomandohen masa paraprake si përdorimi i maskave. Specht thekson se nuk ka nevojë për panik: “Koronavirusi nuk është më i veçantë – nëse dikush ka frikë nga ai, duhet të ketë frikë edhe nga viruset e tjera që qarkullojnë gjatë vjeshtës dhe dimrit.”