Raporti i OKB-së: Koreja e Veriut ekzekuton njerëz nëse shikojnë filma të huaj

Qeveria e Koresë së Veriut po zbaton gjithnjë e më shumë dënimin me vdekje, përfshirë për njerëzit që kapen duke shikuar filma dhe drama televizive të huaja, zbuloi një raport i OKB-së.

Diktatura, e cila mbetet kryesisht e izoluar nga bota, po i nënshtron gjithashtu njerëzit e saj punës së detyruar, duke kufizuar më tej liritë e tyre, shtoi raporti, shkruan BBC.

Zyra e OKB-së për të Drejtat e Njeriut zbuloi se gjatë dekadës së fundit shteti i Koresë së Veriut kishte forcuar kontrollin mbi “të gjitha aspektet e jetës së qytetarëve”.

“Asnjë popullsi tjetër nuk është nën kufizime të tilla në botën e sotme”, përfundoi raporti, duke shtuar se mbikëqyrja ishte bërë “më e përhapur”, e ndihmuar pjesërisht nga përparimet në teknologji.

Komisioneri i Lartë i OKB-së për të Drejtat e Njeriut, Volker Turk, tha se nëse kjo situatë vazhdon, koreano-veriorët “do t’i nënshtrohen më shumë vuajtjeve, shtypjes brutale dhe frikës që kanë duruar për kaq gjatë”.

Raporti, i cili bazohet në më shumë se 300 intervista me njerëz që janë arratisur nga Koreja e Veriut në 10 vitet e fundit, zbuloi se dënimi me vdekje po shpeshtohet.

Të paktën gjashtë ligje të reja janë futur që nga viti 2015 që lejojnë dënimin. Një krim që tani mund të dënohet me vdekje është shikimi dhe ndarja e përmbajtjes së mediave të huaja, siç janë filmat dhe dramat televizive, ndërsa Kim Jong Un punon për të kufizuar me sukses aksesin e njerëzve në informacion.