SHBA e “zhgënjyer” me Rusinë: Rubio takon Lavrovin, thotë se diskutuan për një “ide të re” ruse

Sekretari amerikan i Shtetit, Marco Rubio, është takuar sot në margjinat e samitit të ASEAN-it në Malajzi me ministrin e Jashtëm rus, Sergei Lavrov.

Sipas The Moskow Times, pas takimit Rubio u ka thënë gazetarëve se i kishte shprehur homologut rus “zhgënjimin dhe frustrimin” për mungesën e progresit në zgjidhjen e luftës në Ukrainë.

“Unë përsërita atë që tha presidenti (Donald Trump), njëkohësisht zhgënjim dhe frustrim për mungesën e përparimit,” është shprehur Rubio, duke e përshkruar bisedën me Lavrovin si “të hapur dhe të rëndësishme”.

Ndërkohë, Moska e ka përshkruar takimin si një “kambio substantive dhe të hapur pikëpamjesh”.

Në anën tjetër, agjencia AFP ka raportuar se Rubio ka thënë që Lavrov kishte ndarë “një ide të re” për Ukrainën, pa dhënë detaje për përmbajtjen e saj.

“Nuk është një qasje e re. Është një ide apo koncept i ri që do ta marr me vete për t’ia paraqitur presidentit. Nuk është diçka që automatikisht çon në paqe, por mund të hapë një derë drejt një rrugëzgjidhjeje,” ka thënë Rubio, sipas AFP-së.