Stuhi e fuqishme në Shqipëri: Përmbysen disa rrugë, rrëzohen disa pemë, e vonesa në fluturime

Shqipëria është përfshirë gjatë ditës së sotme nga një stuhi e fortë shoqëruar me reshje të dendura shiu, erëra të fuqishme dhe mjegull, të cilat kanë shkaktuar probleme në disa qytete të vendit.

Në Tiranë, stuhia ka sjellë rrëzimin e disa pemëve në zona të ndryshme të kryeqytetit, si te ish-stacioni i Trenit, Shkolla e Bashkuar apo në zonën e Oxhakut. Në disa prej akseve, qarkullimi është bllokuar përkohësisht, ndërsa era e fortë ka ngritur në ajër edhe mbeturina, duke rritur vështirësitë për qytetarët.

Situata e motit ka prekur edhe Aeroportin Ndërkombëtar të Rinasit, ku fluturimet janë shoqëruar me vonesa dhe anulime. Sipas njoftimit zyrtar, të paktën 11 fluturime mbërritjeje nga qytete të ndryshme evropiane, mes tyre Roma, Milano, Parisi, Vjena, Frankfurti e Zyrihu, kanë pësuar shtyrje, ndërsa janë anuluar dy linja për në Pescara dhe Hamburg.

Në Vlorë, era e fortë ka sjellë një stuhi rëre që ka mbuluar qytetin bregdetar. Pamjet tregojnë rrugë të mbushura me pluhur dhe dukshmëri të ulët, ndërkohë që pushuesit kanë nxituar të largohen, duke krijuar trafik të rënduar në akset hyrëse dhe dalëse të qytetit.

Ndërkohë, edhe Durrësi është përfshirë nga reshje të dendura dhe erëra të fuqishme, të cilat kanë shkaktuar rrëzimin e pemëve dhe probleme në qarkullim.

Edhe në Lezhë raportohet për përmbytje rrugësh pas reshjeve intensive, duke krijuar vështirësi në lëvizjen e automjeteve.