Tragjedi në rrugë: Fëmija humb jetën pasi u godit nga një kamion

Një fëmijë ka humbur jetën pasi u përfshi në një aksident me një kamion në Essex të Anglisë, ndërsa policia ka arrestuar drejtuesin e mjetit.

Sipas autoriteteve, policia u njoftua për ngjarjen rreth orës 16:20 të së premtes në rrugën Epping Road, në Ongar, ku gjeti fëmijën të plagosur rëndë. Ai u dërgua menjëherë në spital, por nuk arriti t’u mbijetojë plagëve.

Shoferi i kamionit, një 48-vjeçar nga Derbyshire, u arrestua në vendngjarje nën dyshimin për shkaktim të lëndimeve të rënda me drejtim të rrezikshëm të automjetit, shkruan Metro

Më vonë, pas vdekjes së fëmijës, ai u lirua me kusht deri në mesin e shtatorit, ndërsa hetimet për rastin vazhdojnë.

Policia e Essex-it bëri të ditur se familja e viktimës po mbështetet nga zyrtarë të specializuar.

“Fëmija pësoi lëndime të rënda dhe u dërgua në spital, ku fatkeqësisht ndërroi jetë. Familja e tij po mbështetet nga oficerë të specializuar,” thuhet në njoftimin e policisë.

Autoritetet kanë mbyllur përkohësisht rrugën për të kryer hetimet në vendngjarje dhe u kanë bërë thirrje qytetarëve që mund të kenë informacione, pamje nga kamerat e sigurisë apo kamerat e automjeteve (dashcam), të kontaktojnë policinë për të ndihmuar në zbardhjen e rastit.