UNICEF: Izraeli bllokon hyrjen e injeksioneve dhe ushqimit për fëmijë në Gaza

UNICEF tha sot se Izraeli po ndalon hyrjen e furnizimeve bazë në Gaza, duke përfshirë injeksionet për vaksinimin e fëmijëve dhe shishet me formulë për foshnje, duke e bërë të vështirë për agjencitë humanitare që përpiqen të ndihmojnë popullsinë në territorin e shkatërruar nga lufta.

Sipas UNICEF-it, 1.6 milionë injeksione dhe frigoriferë me energji diellore për ruajtjen e vaksinave kanë pritur prej muajsh për t’u zhdoganuar.

“Si injeksionet ashtu edhe frigoriferët konsiderohen artikuj me përdorim të dyfishtë nga Izraeli dhe është shumë e vështirë për ne të kalojmë nëpër dogana dhe inspektime”, tha zëdhënësi i UNICEF-it, Ricardo Pires.

Termi “përdorim i dyfishtë” i referohet artikujve që, sipas vlerësimeve izraelite, mund të kenë aplikime si ushtarake ashtu edhe civile.