FIFA i del në krah Infantinos – pritet t’ia mbulojë shpenzimet ligjore mes presionit në rritje

Presidenti i FIFA-s, Gianni Infantino, po përballet me presion të madh pas vendimit për të hequr dorë nga plani për shitjen e një pjese të të drejtave komerciale të kompeticioneve të FIFA-s, veçanërisht të Kupës së Botës, tek investitorët privatë.

Situata mund të përshkallëzohet edhe më tej, pasi Infantino rrezikon të përballet me beteja ligjore që lidhen me Bashkimin Evropian.

Sipas raportimeve, Brukseli nuk e ka fshehur qëndrimin kritik ndaj presidentit të FIFA-s, ndërsa disa çështje ligjore janë iniciuar edhe në Shtetet e Bashkuara të Amerikës.

FIFA pritet t’i mbulojë shpenzimet ligjore

“The Athletic” raporton se FIFA pritet t’i mbulojë Infantinos shpenzimet e mundshme ligjore, ndërkohë që UEFA po shqyrton gjithashtu mundësinë e procedurave penale ndaj tij në Zvicër.

Arsyeja për një mbështetje të tillë nga FIFA lidhet me faktin se Infantino, sipas këtij interpretimi, ka vepruar në emër të institucionit dhe në cilësinë e presidentit të tij.

Pavarësisht presionit në rritje, Infantino deri më tani nuk ka dhënë asnjë sinjal se po mendon largimin.

Presioni vjen nga disa konfederata

Kritikat dhe kërkesat për largimin e tij nuk vijnë vetëm nga UEFA.

Sipas raportimeve, edhe përfaqësues brenda CONCACAF-it dhe Konfederatës Aziatike të Futbollit kanë shprehur pakënaqësi me drejtimin aktual të FIFA-s.

Megjithatë, brenda vetë CONCACAF-it nuk ka një qëndrim unik.

Federatat anëtare janë të ndara mes atyre që duan largimin e Infantinos dhe atyre që preferojnë vazhdimin e mandatit të tij.

Afati për kundërkandidatët deri më 18 nëntor

Çdokush që synon ta sfidojë Infantinon në zgjedhjet për president të FIFA-s duhet ta paraqesë kandidaturën deri më 18 nëntor.

Zgjedhjet pritet të mbahen gjatë Kongresit të FIFA-s në Marok, në muajin mars.

Për momentin, pavarësisht presionit politik dhe juridik, Infantino vazhdon ta ruajë pozitën e tij dhe të ketë mbështetjen financiare të FIFA-s për përballjen me çështjet ligjore që mund të hapen ndaj tij.