Alarm në Greqi nga virusi i Nilit Perëndimor: 232 raste dhe 19 viktima

Greqia po përballet me një rritje shqetësuese të rasteve me virusin e Nilit Perëndimor. Brenda një jave janë regjistruar 75 raste të reja të infektimit të marrë në vend, duke e çuar numrin total të rasteve gjatë sezonit të vitit 2026 në 232.

Nga të infektuarit, 165 kanë zhvilluar simptoma që prekin sistemin nervor qendror, përfshirë encefalitin, meningjitin dhe paralizën akute, ndërsa 67 kanë pasur simptoma më të lehta ose nuk kanë shfaqur simptoma neurologjike. Deri më 26 gusht, janë regjistruar 19 viktima, të gjitha persona mbi 65 vjeç.

Në spitale ndodhen 73 pacientë, 26 prej tyre në kujdes intensiv, ndërsa 124 pacientë janë liruar nga spitali. Rajoni më i prekur është Atika, ku autoritetet kanë raportuar qarkullim veçanërisht të madh të virusit.

 Raste janë regjistruar gjithashtu në Thesali, Maqedoninë Qendrore, Peloponez dhe Greqinë Qendrore. Autoritetet kanë përcaktuar edhe disa zona të tjera si me rrezik të lartë dhe paralajmërojnë se mund të diagnostikohen raste të reja si në zonat e prekura, ashtu edhe në zona të tjera, shkruan Euronews.