Albin Kurti amniston Dimal Bashën: Ai ka thënë se kapitulli që e ka shkruar nuk ka të bëjë me UÇK-në

Kryeministri në detyrë, Albin Kurti, ka folur lidhur me zhurmën publike rreth artikullit ku bashkautor është kryetari i zgjedhur i Kuvendit të Kosovës, Dimal Basha kundër UÇK-së.

Kurti duke tentuar ta amnistojë Bashën tha se ky i fundit e ka sqaruar publikisht se pjesa e shkruar nga ai nuk ka të bëjë fare me UÇK-në, dhe se artikulli është botuar para më shumë se një dekade.

“Dimal Basha e ka dhënë sqarimin për atë publikim që është bërë para më shumë se një dekade. Ai ka thënë se kapitulli që e ka shkruar nuk ka të bëjë me UÇK-në. Edhe në fjalimin e tij pas zgjedhjes si kryetar Kuvendi, ai shprehu vlerësimet më të larta për këtë vlerë të kombit shqiptar”, tha Kurti.

Mes tjerash, ai e cilësoi bujën që bëri ky shkrim si keqinterpretim dhe deformim”.

“Problemet i kemi kur është nënshkruar ‘Zajednica’ në 2013, kur janë amnistuar kriminelët serbë në veri po ashtu në 2013, kur është votuar Gjykata Speciale në 2015, kur është themeluar Lista Serbe bashkë me Beogradin në 2013. Problemet i kemi kur politikanët e Kosovës kanë bërë qeveri duke u varur nga Lista Serbe, apo kur kanë hyrë në pazare për ndarje të Kosovës, jo te ky artikull ku manipulohet një kapitull për të cilin ky s’ka faj”, tha Kurti.