Familja e Lekës ka bërë të ditur se, falë solidaritetit dhe kontributit të qytetarëve, është arritur shuma e nevojshme për trajtimin e tij.
Familja ka shprehur mirënjohje për të gjithë ata që kontribuuan financiarisht, shpërndanë thirrjen për ndihmë dhe ofruan përkrahje morale në këtë periudhë të vështirë.
Po ashtu, familja ka bërë të ditur se Ministria u ka premtuar se do ta mbulojë pjesën e mbetur të shpenzimeve.
Njoftimi:
Të dashur miq, familjarë dhe të gjithë njerëzit me zemër të madhe,
Nuk ka fjalë të mjaftueshme për të shprehur mirënjohjen dhe falënderimin tonë ndaj secilit prej jush që u solidarizua, kontribuoi dhe ndau thirrjen tonë për ndihmë.
Në një moment shumë të vështirë për familjen tonë, na dëshmuat se solidariteti, humanizmi dhe dashuria njerëzore janë më të forta se çdo vështirësi. Çdo kontribut, pavarësisht shumës, çdo shpërndarje dhe çdo fjalë inkurajuese kanë pasur një vlerë të jashtëzakonshme për ne.
Falë zemërgjerësisë suaj, shuma e kërkuar tashmë është arritur. Gjithashtu, jemi mirënjohës ndaj Ministrisë, e cila na ka premtuar se pjesën e mbetur të shpenzimeve do ta mbulojë ajo. Për këtë arsye, dëshirojmë t’ju njoftojmë se për momentin po e ndërpresim fushatën e mbledhjes së donacioneve.
Nga zemra, ju falënderojmë të gjithëve, pa përjashtim. Falënderojmë ata që kontribuuan, ata që shpërndanë thirrjen tonë dhe të gjithë ata që na qëndruan pranë me lutje, mesazhe dhe përkrahje morale.
Ju lutemi, mos i ndalni lutjet tuaja për Lekën. Përkrahja juaj nuk na duhet vetëm në aspektin financiar, por edhe në këtë rrugëtim të vështirë që po e kalojmë. Lutjet, shpresat dhe energjia juaj pozitive janë shumë të çmuara për ne.
Këtë humanizëm dhe këtë mbështetje nuk do ta harrojmë kurrë.
Zoti ju shpërbleftë secilin me shëndet, lumturi dhe të mira në familjet tuaja. Ju qofshim borxhli për gjithë këtë dashuri dhe solidaritet!
Faleminderit që u bëtë pjesë e shpresës sonë për Lekën!
