Organizatori i protestës “Jo në emrin tim”, Çlirim Haziri, ka ftuar qytetarët që edhe sonte t’i bashkohen tubimit në Sheshin “Skënderbeu” në Prishtinë, duke shënuar një javë të protestave të përnatshme.
Në një postim në Facebook, Haziri ka thënë se për shtatë net radhazi qytetarët janë mbledhur me të njëjtin qëllim dhe me të njëjtën kërkesë – drejtësi.
“Sot bëhet një javë. 7 ditë rresht në shesh. 7 net pa u ndalur. Një javë bashkë, me të njëjtin zë dhe të njëjtën kërkesë: DREJTËSI!”, ka shkruar Haziri.
Ai ka shtuar se numri i qytetarëve në shesh është rritur nga nata në natë, ndërsa ka bërë të ditur se protesta e radhës do të mbahet sonte, nga ora 21:00.
“Një javë qëndresë. Një javë bashkë. Për UÇK-në. Nuk do të ndalemi deri në plotësimin e kërkesave tona! Shihemi sonte!”, ka shkruar ai.
Protestat nën moton “Jo në emrin tim” po mbahen prej disa netësh radhazi në Sheshin “Skënderbeu”, në kundërshtim të vendimit të Dhomave të Specializuara ndaj ish-krerëve të UÇK-së. Mediat raportuan se edhe në natën e gjashtë në shesh ishin mbledhur mijëra protestues.
