Fatmir Sheholli del para Gjykatës, akuzohet për spiunazh e shantazh

Fatmir Sheholli u paraqit sot në Gjykatën Themelore në Prishtinë, për seancën fillestare ku po akuzohet për spiunazh e shantazh tek BIA serbe, shkruan GazetaDemos.

Sipas aktakuzës, Agjencia për Siguri dhe Inteligjencë e Serbisë – BIA, i kishte dhënë Shehollit 5 mijë euro dhe materiale audio, me qëllim të ndikimit në zgjedhjet lokale te komuniteti serb në Kosovë.

Prokuroria pretendon se, pak ditë para zgjedhjeve lokale të vitit të kaluar, Sheholli kishte marrë materiale që përmbanin biseda audio dhe transkriptime të disa zyrtarëve të lartë të Ministrisë për Komunitete dhe Kthim, të udhëhequr nga Nenad Rashiq.

Sipas aktakuzës, qëllimi ishte që këto materiale të publikoheshin në mediat kosovare për të diskredituar zyrtarët dhe institucionet e Kosovës dhe për të ndikuar në procesin zgjedhor.

Në dokumentin akuzues thuhet se Sheholli ia kishte dorëzuar materialet gazetarit dhe analistit Milaim Zeka, së bashku me shumën prej 1 mijë eurosh, duke e udhëzuar edhe për mënyrën dhe kohën e publikimit të tyre në emisionin “Pa Rrotlla”.