Kryetarja e Kuvendit të Kosovës, Albulena Haxhiu ka pritur në takim ambasadorin e OSBE-së në Kosovë, Gerard McGurk, me të cilin ka biseduar për të drejtat dhe sigurinë e grave, fuqizimin e të rinjve, lirinë e medias dhe reformën zgjedhore.
Haxhiu, përmes një postimi në profilin e saj në rrjetin social Facebook, ka shkruar se vëmendje i është kushtuar agjendës parlamentare për barazinë gjinore dhe rolit të Kuvendit në mbikëqyrjen e institucioneve dhe parandalimin e dhunës ndaj grave.
Postimi i plotë:
Me ambasadorin e OSBE-së në Kosovë, Gerard McGurk, patëm një bisedë të hapur e përmbajtjesore për çështje që kërkojnë vëmendjen dhe angazhimin tonë të përbashkët.
Diskutuam për të drejtat dhe sigurinë e grave, fuqizimin e të rinjve, lirinë e medias dhe reformën zgjedhore. Vëmendje të veçantë i kushtuam agjendës parlamentare për barazinë gjinore dhe rolit të Kuvendit në mbikëqyrjen e institucioneve dhe parandalimin e dhunës ndaj grave.
Biseduam gjithashtu për prioritetet legjislative të Kuvendit dhe mundësitë për mbështetje.
