Heroi i ditës në Gjermani – Burim Doberlluka nga Vushtrria shpëton katër amerikanë në Liqenin e Dortmundit

Një ngjarje heroike ka ndodhur të dielën mbrëma në Gjermani, kur një qytetar nga Vushtrria, Burim Doberlluka, shpëtoi katër persona nga mbytja në Liqenin Phoenix (Phoenix-See) në Dortmund.

Sipas mediave gjermane, rreth orës 20:00 një varkë pedalesh me katër persona – të gjithë shtetas amerikanë – u përmbys në mes të liqenit. Notifikimet e para tek shërbimi i urgjencës sinjalizuan për një rrezik serioz për jetën e tyre, duke bërë që zjarrfikësit dhe njësitë e specializuara të shpëtimit në ujë të mobilizohen menjëherë, transmeton Jepi zë.

Megjithatë, para se ekipet e shpëtimit të mbërrinin, Burim Doberlluka, i cili po ndodhej pranë vendit të ngjarjes, pa situatën e rrezikshme dhe ndërhyri me guxim. Ai notoi drejt varkës së përmbysur dhe arriti t’i nxjerrë të katërtit nga uji. Më pas, duke përdorur të njëjtën varkë të përmbysur, i solli të sigurt në breg.

Të katër personat shpëtuan pa lëndime serioze, por u kontrolluan nga ekipi mjekësor në vendngjarje dhe u dërguan për verifikim të mëtejshëm në spital si masë sigurie.

Zyrtarët e zjarrfikësve në Dortmund e përshkruan ndërhyrjen e Doberllukës si “të vëmendshme dhe jashtëzakonisht të guximshme”, duke theksuar se veprimi i tij parandaloi një tragjedi të mundshme.