Tre persona kanë pësuar lëndime, dy prej tyre rëndë, si pasojë e një aksident trafiku ndodhur mesditën e sotme në Vragoli.
Siç konfirmon Policia e Kosovës, aksidenti erdhi mbi dyshimet se kamioni ka humbur drejtimin dhe ka goditur dhe katër automjete të tjera.
Të lënduarit aktualisht po trajtohen në Qendrën Klinike Universitare të Kosovës.
”Sot, rreth orës 14:35, në rrugën nacionale Prishtinë-Pejë, ka ndodhur një aksident i rëndë trafiku, ku dyshohet se drejtuesi i një automjeti transportues (kamion) me targa vendore ka humbur drejtimin e mjetit, ka kaluar në anën e kundërt të rrugës dhe ka goditur katër automjete të tjera.
Si pasojë e këtij aksidenti, deri në këto momente raportohet se dy persona kanë pësuar lëndime të rënda dhe një tjetër ka marrë lëndime të lehta, të cilët janë dërguar në QKUK për trajtimin e nevojshëm mjekësor. Njësitet përkatëse të Policisë së Kosovës kanë dalë menjëherë në vendngjarje dhe po ndërmarrin veprimet e nevojshme hetimore për zbardhjen e plotë të shkaqeve të aksidentit”.
Policia e Kosovës tutje në deklaratën e saj, apelon tek të gjithë pjesëmarrësit në trafik që ne veçanti shoferët të respektojnë rregullat dhe shenjat e trafikut, të përshtatin shpejtësinë me kushtet e rrugës dhe të kenë kujdes të shtuar gjatë drejtimit të mjeteve, në mënyrë që të shmangen ngjarje të tilla të rënda që rrezikojnë jetën dhe shëndetin e qytetarëve.
