Musliu i reagon BE-së pasi tha se vendimi i Speciales duhet të respektohet: Mos luani me gjakun që u derdh për Liri

Bashkimi Europian, si një nga mbështetësit kryesorë të Dhomave të Specializuara të Kosovës, ka kërkuar respektimin e vendimit që do të merret ndaj katër të akuzuarve në Hagë, Hashim Thaçi, Kadri Veseli, Jakup Krasniqi e Rexhep Selimi.

Por, BE’ja vë në pah se vendimi i 16 shtatorit nuk është fundi i procesit gjyqësor dhe se ai mund të apelohet nga të dyja palët.

Ndaj kësaj deklarate ka reaguar deputetja e PDK-së, Ganimete Musliu, e cila i ka bërë thirrje BE-së dhe të gjitha palëve “të mos luani me gjakun që u derdh për Liri!”.

Postimi i saj i plotë:

I bëj thirrje BE-së dhe të gjitha palëve: Mos luani me gjakun që u derdh për Liri!

Lirinë nuk na e fali askush. E paguam me gjakun e bijve dhe bijave më të mira të Kombit. E paguam me gjakun e fëmijëve, nënave, baballarëve, vëllezërve dhe motrave tona.

Prandaj, askush nuk ka të drejtë ta relativizojë, ta nëpërkëmbë apo ta trajtojë si të mirëqenë sakrificën mbi të cilën u ngrit liria jonë.

Mirënjohje pa fund atyre që u bënë mburoja jonë qiellore kur na digjej dheu nën këmbë, duke u ngritur në mbrojtje të së drejtës së një populli për të jetuar i lirë.

Liria nuk është dhuratë. Liria është gjak, është sakrificë!