Kryetari i Prishtinës, Përparim Rama, ka reaguar ashpër pas votimit të Albin Kurtit për një mandat të ri si Kryeministër i Kosovës.
Rama ka thënë se Kurti u zgjodh në krye të Qeverisë me votat e deputetëve të Vetëvendosjes dhe Listës Serbe, duke theksuar se në sallë nuk ishte asnjë deputet tjetër shqiptar.
Sipas Ramës, kjo dëshmon, siç u shpreh ai, se pas 16 vitesh në politikë Kurti nuk ka arritur të ndërtojë “asnjë minimum besimi” me subjektet tjera politike shqiptare.
“Çuditërisht këtë besim e ka me Listën Serbe”, ka shkruar Rama.
Ai ka kritikuar edhe gjestin e Kurtit gjatë seancës, duke iu referuar shprehjes “me pre me gërshërë”.
“Kënd, Albin? Gazetarët? Opozitën? Kundërshtarët politikë? Apo 52.87% e qytetarët që nuk të kanë votuar?”, ka shkruar Rama.
Rama ka thënë se një Kryeministër duhet të përfaqësojë të gjithë qytetarët dhe jo vetëm ata që e kanë votuar, duke e akuzuar Kurtin se nuk po e përfaqëson këtë popull.
“Kosova nuk ka nevojë për një Kryeministër që di vetëm t’i mundë kundërshtarët me hile e numra, natën, shpejtë, në seanca të jashtëzakonshme në koordinim me serbët. Ka nevojë për një Kryeministër që i përfaqëson të gjithë”, ka deklaruar ai.
Në fund, Rama ka ironizuar Kurtin duke e quajtur “Kryeministër të Vetëvendosjes dhe Listës Serbe”, ndërsa ka ngritur pikëpyetje se çfarë e lidh Kurtin me këtë subjekt.
“Është koha me i tregu qytetarëve çka të lidh me ta dhe prej nga vjen ky besim i ndërsjelltë i joti me serbët?”, ka shkruar Rama.
