Universiteti i Prishtinës “Hasan Prishtina” ka shënuar rritje të interesimit të kandidatëve për regjistrim këtë vit, me mbi 1 mijë aplikantë më shumë krahasuar me vitin paraprak.
Rektori i UP-së, Arben Hajrullahu, e ka vlerësuar këtë rritje si një tregues pozitiv për universitetin, duke thënë se ajo reflekton punën dhe angazhimin e vazhdueshëm të institucionit.
“Këtë vit kemi pasur rritje mbi 1 mijë aplikantë, ka më shumë se sa në vitin paraprak. E kjo është një lajm shumë i mirë dhe që e dëshmon punën e madhe që është dhe që është duke u bërë në Universitetin e Prishtinës”, ka deklaruar Hajrullahu.
Ai ka theksuar se Universiteti i Prishtinës vazhdon të jetë ndër institucionet kryesore të arsimit të lartë në hapësirën shqiptare.
“Universiteti i Prishtinës vazhdon të jetë universiteti lider jo vetëm në Kosovë, por në rajon, në të gjitha universitetet në gjuhën shqipe në Ballkan e në botë”, ka thënë rektori Hajrullahu.
Sipas tij, këtë vit ka pasur interesim edhe nga studentë jashtë Kosovës, ndërsa në mesin e të pranuarve në afatin e parë janë edhe katër studentë nga diaspora.
“Ka edhe aplikantë edhe nga vendet fqinje të Kosovës, përveç vendeve të rezervuara, e është shumë e mirë se këtë radhë vetëm në afatin e parë janë pranuar edhe 4 studentë nga diaspora”, ka bërë të ditur ai.
Hajrullahu ka njoftuar se janë miratuar edhe vendet e rezervuara për shqiptarët në Turqi me prejardhje nga Kosova, për arbëreshët e Italisë, si dhe për pjesëtarët e diasporës që kanë origjinë nga Kosova.
Mes tjerash, ai theksoi se ka ripërtëritje të personelit akademik pasi sipas tij, nën menaxhimin e tij janë pranuar mbi 100 profesorë që janë të pranuar ose janë në proces të pranimit profesorë e asistentë.
Përveç kësaj, rektori kërkoi mbështetje reale nga institucionet relevante e jo vetëm fjalë.
“Ne vetëm në këtë vit, nën menaxhimin tim, kemi pranuar diku mbi 105 profesorë, ose janë të pranuar ose janë në proces të pranimit profesorë e asistentë. Pra ka një ripërtëritje të personelit akademik. Universiteti i Prishtinës ka hapësira të mjaftueshme, ka kapacitete të mjaftueshme. Neve vetëm na nevojitet edhe mbështetje reale, jo me fjalë, por mbështetje reale me buxhet konkret, që vërtet të arrijmë të financojmë aktivitetet e planifikuara, ndër të tjera edhe në strategjinë të cilën ne kemi hartuar e miratuar, strategjinë e zhvillimit të Universitetit të Prishtinës për vitin 2026–2030/31”, shtoi rektori.
Hajrullahu potencoi se kanë mbështetje por për shkak të zhvillimeve të fundit politike, fokusi nuk ka qenë tek Universiteti i Prishtinës, duke rikujtuar që u duhen partnerë që të ndërveprojnë me ta.
