Ministri i Punëve të Brendshme, Xhelal Sveçla ka reaguar pas aktgjykimit të Gjykatës Themelore në Prishtinë, ku shpalli dënim me burgim të përjetshëm për dy nga të akuzuarit e sulmit terrorist në Banjskë, Vlladimir Tolliq, Bllagoje Spasojeviq, teksa gjithashtu me 30 vjet burgim u dënua i akuzuari Dushan Maksimoviq.
Sveçla në reagimin e tij ka thënë se vendimi për sulmin terrorist në Banjskë duhej dhe duhet të reflektojë vetëm një standard: dënime maksimale për të gjithë të përfshirët.
“Ky standard duhet të vlejë për secilin pjesëtar si pjesë e një rrjeti shumë më të gjerë prej 45 personash të identifikuar, pa përjashtim. Sulmi i 24 shtatorit 2023 nuk ishte një akt i izoluar, por një operacion i organizuar me mbështetje shtetërore nga Serbia, me synim cenimin e rendit kushtetues dhe aneksimin e një pjese të territorit të Kosovës. Atë ditë, Republika e Kosovës jo vetëm që përballoi terrorizmin, por ndali një skenar të rrezikshëm për ndarje. Këtë e dëshmojnë faktet dhe provat që dokumentojnë përfshirjen e drejtpërdrejtë të Serbisë”, tha ai.
Ministri gjithashtu ka kërkuar përgjegjësi nga Serbia për rolin e saj politik, financiar dhe logjistik në këtë agresion. “Dënimi nuk e kthen heroin Afrim Bunjaku, por është një hap drejt drejtësisë për sakrificën e tij dhe për dhimbjen që mbetet te familja, kolegët dhe gjithë qytetarët tanë. Ky vendim duhet të jetë një mesazh i qartë: kushdo që cenon Republikën e Kosovës dhe Policinë e saj, do të përballet me drejtësinë. Drejtësia për Banjskën nuk përfundon këtu. Ajo përmbyllet vetëm kur të gjithë përgjegjësit të dalin para drejtësisë, me në krye Milan Radoiçiqin”, tha ai.
