Tahiri kërkon llogaridhënie nga LVV-ja për rastin Dehari: S’keni bërë asgjë

Shefi i Grupit Parlamentar të Aleancës për Ardhmërinë e Kosovës, Besnik Tahiri, ka kërkuar drejtësi për rastin e Astrit Deharit, në 10-vjetorin e vdekjes së aktivistit të Lëvizjes Vetëvendosje, por ka theksuar se krahas drejtësisë duhet të ketë edhe përgjegjësi dhe llogaridhënie nga ata që janë në pushtet.

Gjatë deklarimeve jashtë rendit të ditës në seancën e Kuvendit, Tahiri ka drejtuar kritika ndaj shumicës parlamentare, përkatësisht Lëvizjes Vetëvendosje, duke thënë se për gjashtë vjet në pushtet nuk ka arritur të sigurojë as një evidencë të thjeshtë për atë që ka ndodhur në rastin e Deharit.

“Lëreni këtë punë, mos e politizoni, kërkoni përgjegjësi edhe ndaj personave që janë në pushtet tash e gjashtë vjet dhe nuk kanë bërë asgjë për këtë temë. Pra ne kërkojmë drejtësi si ju, por kërkojmë edhe përgjegjësi dhe llogaridhënie”, është shprehur Tahiri.

Ai ka folur edhe për Raportin e Kosovës, i cili të mërkurën u është dorëzuar udhëheqësve të shtetit, duke e cilësuar atë si raportin më të keq që i është dorëzuar ndonjëherë Kosovës.