Mbretëria e Bashkuar është “e gatshme të përparojë” drejt përdorimit të vlerës së plotë të aseteve të ngrira ruse për të mbështetur përpjekjet e luftës së Ukrainës, ka deklaruar këtë të shtunë kryeministri britanik, Sir Keir Starmer.
Në një deklaratë të përbashkët, udhëheqësit e Mbretërisë së Bashkuar, Francës dhe Gjermanisë theksuan se ky veprim do të “rrisë presionin” mbi presidentin rus, Vladimir Putin, dhe “do ta sjellë Rusinë në tryezën e negociatave”.
Starmer shtoi se masa do të ndërmerret “në bashkëpunim të ngushtë” me Shtetet e Bashkuara të Amerikës.
Sipas të dhënave zyrtare, sanksionet e Mbretërisë së Bashkuar kanë ngrirë më shumë se 25 miliardë paund asete ruse që prej nisjes së pushtimit të plotë të Ukrainës nga Moska në vitin 2022. Deri më tani, fondet e përdorura për të ndihmuar Ukrainën janë marrë vetëm nga fitimet dhe interesat e grumbulluara mbi këto asete.
Sir Keir i ka thënë presidentit ukrainas, Volodymyr Zelensky, se Mbretëria e Bashkuar, Franca dhe Gjermania janë “të bashkuara në dëshirën për të nxitur përparimin drejt përdorimit të vlerës së plotë të aseteve sovrane ruse të imobilizuara për t’i dhënë fund luftës”.
