Hoxha: Protestat në Tiranë nuk rrezikojnë rrugën e Shqipërisë drejt BE-së

Ministri për Evropën dhe Punët e Jashtme i Shqipërisë, Ferit Hoxha, ka deklaruar se protestat qytetare që po zhvillohen prej ditësh në Tiranë nuk pritet të kenë ndikim në procesin e integrimit evropian të vendit.

Gjatë një bashkëbisedimi me gazetarë nga vendet e Bashkimit Evropian, Hoxha theksoi se protestat janë pjesë e lirisë së shprehjes dhe dëshmi e funksionimit demokratik të shoqërisë shqiptare.

Ai u shpreh se shtetet anëtare të BE-së dhe institucionet evropiane kanë besim në vlerësimet e Komisionit Evropian dhe nuk i konsiderojnë protestat aktuale si pengesë për avancimin e Shqipërisë në rrugën drejt anëtarësimit.

“Qytetarët shqiptarë po ushtrojnë të drejtën e tyre për të shprehur mendimet dhe qëndrimet e tyre në mënyrë demokratike. Kjo nuk përbën shqetësim për partnerët evropianë”, deklaroi Hoxha.

Ministri shtoi se Shqipëria mban komunikim të vazhdueshëm dhe transparent me partnerët ndërkombëtarë, duke diskutuar hapur për të gjitha zhvillimet me interes të përbashkët.

Komentet e Hoxhës vijnë në kohën kur protestat kundër projektit në Zvërnec kanë hyrë në ditën e tyre të dymbëdhjetë, me qytetarët që vazhdojnë të kërkojnë rishikimin e projektit dhe më shumë transparencë nga institucionet.