Bashkimi Europian planifikon të pranojë Ukrainën deri në vitin 2027 për t’i dhënë akses në buxhetin e ardhshëm të BE-së, pretendon Orbán i Hungarisë. Por, ndërsa Volodymyr Zelenskyy këmbëngul në objektivin e tij për anëtarësim në vitin 2027, po aq i vendosur është Viktor Orbán në kundërshtimin e këtij hapi.
Në pamje të publikuara nga zëdhënësi ndërkombëtar i Hungarisë, Zoltán Kovács, Orbán ka pohuar se gjatë samitit të fundit të BE-së, liderëve iu dha një dokument që përshkruante planet e Brukselit për të pranuar Ukrainën në vitin 2027.
“Ata duan ta pranojnë Ukrainën në vitin 2027. Arsyeja është se duan t’i japin Ukrainës para nga buxheti, buxheti shtatë vjeçar europian që nis në vitin 2028. Kjo do të thotë… do të merret nga ne, europianët qendrorë”, tha ai.
“Pra, ka një afat të kufizuar për ta sjellë Ukrainën në BE para fillimit të buxhetit të ardhshëm shtatë vjeçar”, shtoi ai.
Orbán përsëriti kundërshtimin e tij ndaj anëtarësimit të Ukrainës në BE, duke thënë se Ukraina “ nuk mund ta mbrojë Europën nga Rusia” dhe nuk do ta forconte Europën, por “do të na tërhiqte në luftë”.