Rusia mohon vonesat në negociatat për paqe në Ukrainë: Askush s’po vonon asgjë

Zëdhënësi i Kremlinit, Dmitry Peskov, ka reaguar të martën ndaj akuzave të dërguarit të posaçëm amerikan për Ukrainën nga administrata e presidentit Donald Trump, Keith Kellogg, i cili kishte thënë se Rusia është duke i vonuar qëllimisht bisedimet për paqen.

Peskov ka theksuar se Moska zyrtare ka përmbushur të gjitha marrëveshjet e arritura deri tani dhe ka mohuar kategorikisht pretendimet për zvarritje të negociatave.

Në një deklaratë të tij, Keith Kellogg kishte thënë të hënën: “Rusia s’mund të vazhdojë më me zvarritje, teksa bombardon objektiva civile në Ukrainë”, duke kritikuar veprimet e Moskës në kuadër të konflikti në Ukrainë. Megjithatë, Peskov ka kundërshtuar këto akuza, duke theksuar se Rusia është mirënjohëse për rolin e ekipit të Trumpit në lehtësimin e negociatave, porse ka theksuar se nuk po zvarrit bisedimet.

“Askush s’po vonon asgjë këtu”, ka thënë Peskov në një konferencë për media në Moskë. “Natyrisht që jemi në favor të përmbushjes së qëllimeve që po mundohemi t’i arrijmë përmes operacionit special ushtarak, si dhe mjeteve politike e diplomatike. Prandaj, ne nuk jemi të interesuar të shtyjmë asgjë”, ka theksuar ai.

Peskov ka konfirmuar gjithashtu se datat për rundin e tretë të negociatave me delegacionin e Ukrainës akoma nuk janë dakorduar dhe se ato do të diskutohet në të ardhmen e afërt.