Katër persona kanë mbetur të plagosur si pasojë e një sulmi me dron rus ndaj një depoje të naftës në pronësi të kompanisë shtetërore të Azerbajxhanit, SOCAR, në jug të Ukrainës.
Sipas burimeve të cituara nga agjencia e lajmeve Reuters, sulmi ka ndodhur në qytetin Odesa, ku disa dronë goditën objektin industrial të kompanisë.
“Dëmi është i vështirë për t’u vlerësuar në këtë fazë. Disa persona janë plagosur,” ka deklaruar një burim nga industria për Reuters.
Kompania SOCAR operon rreth 60 stacione karburanti në të gjithë territorin e Ukrainës.
Ky nuk është sulmi i parë në infrastrukturën energjetike të rajonit. Më herët gjatë javës, forcat ruse goditën një stacion pompimi në Odesa, që shërbente për importin e karburanteve nga Shtetet e Bashkuara të Amerikës dhe Azerbajxhani, sipas zyrtarëve ukrainas.
Ndërkohë, presidenti i Azerbajxhanit, Ilham Aliyev, ndodhet në Uashington, ku pritet të nënshkruajë një marrëveshje fillestare paqeje me Armeninë.
