Si e bindi Liburn Aliun të kontribuojë në Shqipëri, flet Balluku: Më tha se do të dilte nga politika

Zv. Kryeministrja dhe Ministre e Infrastrukturës dhe Energjisë, Belinda Balluku, ka prezantuar para pak çastesh drejtuesin e ri të Autoritetit Portual Durrës, i cili është ish-ministri i Qeverisë Kurti ll, Liburn Aliu, raporton GazetaDemos.

Ajo teksa foli për Portin e Durrësit dhe planin e ri të detajuar, tregoi se panë mundësinë e lidhjeve me Kosovën dhe Maqedoninë e Veriut.

“Kemi nisur prej kohësh një plan zhvillimi të një porti të ri në afërsi të Durrësit, duke qenë se është pikë referimi për të gjithë rajonin. Me një punë shumë të detajuar dhe me mbështetjen e një prej kompanive më të mëdha, MIE ka arritur të ketë një dokument të jashtëzakonshëm që parashikon duke dizenjuar të gjithë hapat e ndërtimit të këtij porti të ri në Porto Romano.

Nga RMV dhe Kosova kanë kërkuar të jenë pjesë e këtij projekti, duke qenë e mundur krijimi i një lidhje me dy porte të thata, një në Shkup, dhe një në zonën e Prishtinës.

E thënë kjo, procedura ndërkombëtare ka qenë transparente, ka patur disa faza dhe sot kemi arritur në fazën e fundit të projektit për ndërtimin e këtij porti. Interesi ka qenë shumë i lartë, në 31 janar do kemi fituesin e garës për ndërtimin e portit të Durrësit, I dalë nga një garë ndërkombëtare”, tha ajo.

Ndër tjera, Balluku foli edhe për Liburn Aliun, duke trguar detaje se si arritën deri te marrëveshja për këtë pozitë.

“Një koleg i mirë që Kosovën dhe Shqipërinë iu ka parë si treg të përbashkët zhvillimi ekonomik. Në fillim të shtatorit bëra një bisedë me të dhe e pyeta nëse do kishte interes të kontribuonte për Shqipërinë dhe padyshim rrjedhimisht dhe për Kosovën, pasi më kishte thënë se do dilte nga politika.

Iu duk një propozim i përshtatshëm, pasi kishte vendosur të jetonte dhe në Tiranë. Kështu propozimin e çova te kryeministri Edi Rama, dhe kryeministri e pranoi”, tha Belinda Balluku.