Presidenti i SHBA-së, Donald Trump, ka kërcënuar se Shtetet e Bashkuara do të “fillojnë të veprojnë me shpejtësi” në luftën kundër karteleve të drogës, duke pretenduar se ato sundojnë Meksikën, duke bërë që të reagojë edhe presidentja e Meksikës.
Komentet e tij erdhën pas disa deklaratave të ashpra ndaj qeverisë meksikane, të cilën ai e akuzon për paaftësi në trajtimin e krimeve të karteleve.
“SHBA-të tani do të fillojnë të veprojnë menjëherë. Kartelet e drogës po sundojnë Meksikën dhe ne do të veprojmë me shpejtësi”, tha Trump në intervistë, duke lënë të kuptohet se mund të ndërmerren veprime ushtarake tokësore për të përballuar kërcënimin.
Sipas medias, në përgjigje të këtyre kërcënimeve, presidentja e Meksikës, Claudia Sheinbaum, ka marrë hapa për të forcuar komunikimin me qeverinë amerikane. Ajo tha se kishte udhëzuar ministrin e saj të jashtëm, Juan Ramon de la Fuente, të kontaktonte menjëherë Sekretarin e Shtetit të SHBA-së dhe, nëse është e nevojshme, të fliste me Presidentin Trump për të diskutuar mundësitë për të forcuar koordinimin midis dy qeverive në luftën kundër karteleve.
“Qëllimi ynë është të rrisim bashkëpunimin dhe të forcojmë komunikimin për të trajtuar kërcënimin e karteleve të drogës, por gjithmonë në përputhje me sovranitetin dhe respektin për të drejtat e popullit meksikan”, tha Sheinbaum gjatë një konference për shtyp.
Kërcënimet e Trump kanë ngritur shqetësime në Meksikë, ku një pjesë e madhe e popullsisë është tashmë e goditur nga dhuna dhe lufta e përgjakshme mes karteleve të drogës dhe forcave të sigurisë. Po ashtu, ka shqetësime në lidhje me përputhshmërinë e veprimeve të tilla ushtarake me normat ndërkombëtare dhe marrëdhëniet mes dy shteteve.
