Kampionia e Kosovës në futboll Drita, në rrethin e dytë të kualifikimeve në Champions League, do të ketë goxha punë të vështirë kundër skuadrës së famshme daneze, Kobenhavn.
Ndeshjen e parë, djemtë e udhëhequr nga Zekirja Ramadani, do ta zhvillojnë si mysafirë.
Dhe klubi danez doli edhe me një njoftim për “Intelektualët”, që do të udhëtojnë për të parë atë ndeshje:
“Tifozë mysafirë
Tani kemi hapur edhe shitjen e biletave për sektorin D1 të tifozëve mysafirë, i cili do të hapet në orën 17:00.
FC Drita nuk pritet të ketë shumë tifozë që do të udhëtojnë nga Kosova, por ne presim një interesim të madh nga tifozët që ndodhen në Danimarkë dhe Suedi.
Tifozët mysafirë mund të gjejnë më shumë informacion në udhëzuesin tonë të zakonshëm për vizitorët evropianë”, thuhet në postimin e Copenhagenit.
Loja Kobenhavn-Drita, zhvillohet të martën, në orën 19:00 në stadiumin “Parken”.
Kujtojmë se në rundin e parë, “Intelektualët” e mposhtën kampionin e Luksemburgut, Differdange me rezultat të përgjithshëm 4:2.
