“Nivel të përshtatshëm të vetëmenaxhimit” për serbët e Kosovës ka kërkuar Bashkimi Evropian, në përputhje me Marrëveshjen Bazike, e cila ishte arritur nga Kryeministri i Kosovës, Albin Kurti, dhe ish-Presidenti i Serbisë, Aleksandër Vuçiç, në vitin 2023.
Marrëveshja Bazike mes Kosovës dhe Serbisë, me ndërmjetësimin e Bashkimit Evropian dhe Shteteve të Bashkuara të Amerikës, ishte arritur fillimisht në Bruksel më 27 shkurt 2023, dhe më pas ishin dakorduar për Aneksin e Zbatimit në Ohër të Maqedonisë së Veriut, më 18 mars të po atij viti.
Marrëveshja përmbante 11 nene. Neni i 7 i saj fliste për vetëmenaxhimin e serbëve të Kosovës.
Në një përgjigje për Radion Evropa e Lirë, një zëdhënës i BE-së ka thënë se Kosova dhe Serbia duhet t’i zbatojnë të gjitha detyrimet e marra në kuadër të dialogut, pa vonesa të mëtejshme dhe pa parakushte, nëse duan të përparojnë në rrugën e tyre evropiane.
Të premten, në një intervistë për “France 24, Kryeministri Kurti, ka thënë se do ta zbatojë marrëveshjen e Brukselit/Ohrit, e cila, ndër të tjera, përmban edhe Asociacionin e Komunave me Shumicë Serbe.
“Unë do ta respektoj dhe zbatoj Marrëveshjen e Brukselit dhe Aneksin e Zbatimit të vitit 2023”, tha Kurti.
Por, ajo që nevojitet tani, sipas Kurtit, është që, “së bashku me Beogradin, ta nënshkruajmë këtë paketë të Marrëveshjes Bazë me Aneksin e Zbatimit, si garanci juridike, si dëshmi e vullnetit të mirë dhe si proces i besueshëm e kredibil për normalizimin e plotë të marrëdhënieve”.
