Mbrëmë kandidati i VV-së për kryetar të Gjakovës Ardian Gola deklaroi se kandidati për asamble komunale nga radhët e PDK-së Hajdar Beqa kishte abstenuar lidhur me projektet për ndërtimin e shkollës fillore të mesme të ulët “Ganimete Tërbeshi” në fshatin Ponoshec të Komunës së Gjakovës, si dhe projektin për ndërtimin e urës në fshatin Rogovë, po ashtu në Komunën e Gjakovës.
Mirëpo duket se e vërteta është ndryshe pasi Beqa i kishte propozuar këto amandamete dhe se ishin përkrahur nga Komisioni për Buxhet, Punë dhe Transfere i Kuvendit të Kosovës.
”Jam shumë i lumtur që sot, ndonëse jo në shumën që kam kërkuar, dy amendamentet e propozuara nga unë në projektbuxhetin e vitit 2022, njëri që kishte të bënte me projektin “Ndërtimi i Shkollës Fillore të Mesme të Ulët “Ganimete Tërbeshi”, në fshatin Ponoshec, Komuna e Gjakovës dhe tjetri që kishte të bënte me projektin “Ndërtimi i urës në fshatin Rogovë të komunës së Gjakovës”, janë përkrahur nga Komisioni për Buxhet, Punë dhe Transfere, i Kuvendit të Republikës së Kosovës.
Projekti për shkollën në fshatin Ponoshec, i cili është përkrahur në vlerë prej 200.000 (dyqind mijë) euro, është me rëndësi të veçantë për komunitetin, e në veçanti për fëmijët që aktualisht i ndjekin mësimet në shkollën aktuale e cila është shumë e vjetër.