Gecaj: Vizita e admiralit amerikan në veri, mesazh në interes të Kosovës drejtuar Serbisë

Ish-ushtaraku Hysen Gecaj, në “Info Magazine” në Klan Kosova, ka komentuar rëndësinë e vizitës së Admiralit amerikan George Wikoff, komandantit të ri të KFOR-it, gjeneralmajorit Roberto Vergori, dhe drejtorit të përgjithshëm të Policisë së Kosovës, Gazmend Hoxha, në zonën kufitare mes Kosovës dhe Serbisë, në veri të vendit.

Gecaj e vlerësoi këtë vizitë si të rëndësishme për agjendat e sigurisë në Kosovë, duke vënë në pah nevojën për koordinim më të mirë ndërmjet institucioneve vendore dhe mekanizmave ndërkombëtarë të sigurisë.

“Kjo vizitë është shumë e rëndësishme për sa i përket agjendave të sigurisë në Kosovë. Vitet e fundit, ne e dimë se kemi pasur problem në kuptimin politik të një koordinimi mes institucioneve tona të sigurisë me institucionet ndërkombëtare të sigurisë”, u shpreh Gecaj.

Sipas tij, kjo vizitë e konfirmon se Kosova duhet ta bëjë një koordinim shumë më të mirë në ruajtjen e kufijve, sidomos kufijtë të cilët na ndajnë me Serbinë e cila, sipas tij, “përherë ka shfaq agresivitet dhe ende nuk ka heq dorë nga kjo”.