Zëvendësministri i Punëve të Brendshme i Maqedonisë së Veriut, Astrit Iseni, po qëndron për vizitë zyrtare në Kosovë, ku është pritur nga ministri i Punëve të Brendshme, Xhelal Sveçla, dhe zëvendësministri Enver Dugolli.
Gjatë takimit u vlerësua bashkëpunimi ndërmjet Kosovës dhe Maqedonisë së Veriut, veçanërisht bashkëpunimi ndërmjet dy ministrive të Punëve të Brendshme.
Dugolli theksoi rëndësinë e bashkëpunimit për adresimin e sfidave në fushën e sigurisë dhe zbatimit të ligjit, duke vënë në pah prioritetet e Ministrisë së Punëve të Brendshme për krijimin e një klime më të sigurt në vend.
Në takim u diskutua edhe për çështje të përbashkëta, përfshirë marrëveshjet për kalimet kufitare dhe lehtësirat për banorët që jetojnë përgjatë kufirit mes dy vendeve.
Gjatë vizitës, Dugolli dhe Iseni vizituan Qendrën Kombëtare të Menaxhimit të Kufirit, ku u njohën nga afër me procedurat për menaxhimin e kufijve të Kosovës, veçanërisht në pikat kufitare me Maqedoninë e Veriut.
Ata vizituan edhe Akademinë e Kosovës për Siguri Publike, ku u informuan për programet e trajnimit të zyrtarëve policorë, pjesëtarëve të shërbimit korrektues, doganës dhe zjarrfikësve.
Në Akademi, dy zëvendësministrat zhvilluan takim edhe me kadetët Jetlum Bunjaku dhe Sokol Zymberi, djemtë e heronjve të Policisë së Kosovës, Afrim Bunjaku dhe Enver Zymberi. Pas përfundimit të akademisë, ata pritet të ndjekin rrugën e prindërve të tyre në shërbim të sigurisë dhe qytetarëve të Kosovës.
Në fund, Dugolli dhe Iseni vizituan Agjencinë për Regjistrimin Civil, ku u informuan për përmirësimin dhe përshpejtimin e shërbimeve për qytetarët, si dhe për proceset e digjitalizimit.
Zëvendësministri Iseni falënderoi për mikpritjen dhe theksoi përkushtimin e Maqedonisë së Veriut dhe Ministrisë së Punëve të Brendshme për avancimin e agjendave që synojnë forcimin e stabilitetit dhe sigurisë në të dyja vendet.
Ai theksoi gjithashtu rëndësinë e vazhdimit të luftës kundër grupeve kriminale që veprojnë në të dyja vendet dhe që, në shumë raste, bashkëpunojnë ndërmjet tyre.
