Ky është 55-vjeçari që humbi jetën në aksidentin në Mitrovicë

Hysen Oshlani është 55-vjeçari që humbi jetën tragjikisht në një aksident trafiku në Mitrovicë të Jugut.

Familjarë të të ndjerit kanë njoftuar se lidhur me varrimin e tij, të gjitha detajet do të bëhen të ditura me kohë.

Për vdekjen e tij ka shkruar Universiteti “Isa Boletini” në Mitrovicë, ku rektorja uirtene Deva ka shprehur ngushëllime për familjen Oshlanit.

“Të nderuar familjarë, miq e kolegë të të ndjerit, Hysen Oshlani, ju lus të pranoni ngushëllimet më të sinqerta për ndarjen e tij nga jeta. Jemi me ju dhe pranë jush për të ndarë dhimbjen dhe mërzinë për familjarin tuaj dhe kolegun tonë.

Vdekja e tij e papritur në një aksident trafiku, na ka mërzitur tej mase të gjithëve në kolektivin e Universitetit “Isa Boletini” në Mitrovicë, ku ai ka punuar si udhëheqës i punëtorëve të mirëmbajtjes. Ka qene një punëtor i dalluar, një koleg i mirë dhe një njeri i dashur dhe i urtë.

Mirësia e tij të shërbejë si forcë për ta përballuar këtë humbje për familjen, miqtë e kolegët. U prehtë në paqe!”, thuhet në telegram.

Rastin e kishte konfirmuar edhe zëdhënësi i Policisë për rajonin e Mitrovicës, Avni Zahiti.

“Si pasojë e aksidentit ka humbur jetën viktima m/k/sh, rreth 55-vjeçar, ndërsa lëndime kanë pësuar edhe katër persona të tjerë”, kishte thënë Zahiti.

Ndërsa bazuar në informacionet e organeve të rendit, një nga katër të lënduarit është arrestuar pas trajtimit mjekësor.