Një koment i rëndë në rrjetet sociale ka nxitur reagimin e menjëhershëm të deputetit të AAK-së, Daut Haradinaj, i cili ka paralajmëruar masa ligjore ndaj autorit.
“Do të kujtohet si vrasës i pasluftës, haraqegji, hajn e i pafytyrë” – ky është komenti i Daut Hetemit ndaj të cilit deputeti Haradinaj ka paralajmëruar padi.
Komenti ofendues u bë në një postim të gazetarit Adriatik Kelmendi, ku flitej për ish-kryeministrin Ramush Haradinaj.
Përmes një reagimi në profilin e tij zyrtar, Daut Haradinaj u shpreh i prerë se shpifje të tilla nuk do të kalohen në heshtje dhe se autori do të duhet të japë llogari para organeve të drejtësisë.
“Ky koment është një shpifje e ulët e bërë nga një individ në një postim të mbrëmshëm të Adriatik Kelmendit për Ramush Haradinajn. Autori i këtij komenti, bashkë me të gjithë ata që përhapin shpifje të tilla, do të mbajnë përgjegjësi dhe do të përballen pa kompromis me drejtësinë”, ka deklaruar Haradinaj.
Haradinaj ka bërë të qartë se kjo nuk do të mbetet vetëm një reagim publik, por do të ndiqet rruga ligjore për të ndaluar, siç thotë ai, fushatën e shpifjeve ndaj figurës së vëllait të tij dhe liderit të AAK-së.
