Ligji për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar ende nuk ka arritur në Presidencën e Kosovës. Ndonëse Kuvendi i Kosovës e miratoi më 6 tetor, procedura parasheh që ai t’i dërgohet Presidentes vetëm pas përfundimit të afatit për kontestim në Gjykatën Kushtetuese, i cili përfundon më 15 tetor.
Bekim Kupina, këshilltar për media në Presidencë, ka konfirmuar se ligji ende nuk është pranuar nga ky institucion.
Sipas procedurës, pas përfundimit të afatit tetëditor për kontestim, Kuvendi mund t’ia përcjellë ligjin Presidentes Justina Shiroka-Pula. Pas pranimit të tij, ajo do t’i ketë në dispozicion edhe tetë ditë për të ndërmarrë veprimet e parapara, shkruan lajmi.net.
“Presidenca nuk e ka pranuar ende Ligjin për Dhomat e Specializuara. Sipas procedurës, Kuvendi e dërgon te Presidentja vetëm pas mbylljes së afatit 8-ditor për kontestim në Gjykatën Kushtetuese, deri më 15 tetor. Pastaj Presidentja Justina Shiroka Pula i ka në dispozicion 8 ditë për të ndërmarrë veprime”, ka deklaruar për lajmi. net Kupina.
Ndryshimet ligjore u miratuan nga Kuvendi më 6 tetor, në lexim të dytë, pas miratimit në lexim të parë një ditë më herët. Nisma ishte propozuar nga Partia Demokratike e Kosovës (PDK), në një kohë kur në Kosovë po zhvilloheshin debate të forta lidhur me proceset gjyqësore në Dhomat e Specializuara në Hagë.
Ligji nuk parasheh shfuqizimin e Gjykatës Speciale, por synon të ndryshojë disa elemente të funksionimit të saj, përfshirë juridiksionin, periudhën kohore që mbulon, dënimet, vendin ku mbahen ato dhe trajtimin e rasteve që do të mbeteshin jashtë kompetencës së saj.
