Mot me shi, reshje më të dendura priten në këto zona

E marta, 3 nëntor, pritet të sjellë mot të vranët, reshje shiu dhe temperatura të ulëta në Kosovë.

Sipas parashikimit të Institutit Hidrometeorologjik të Kosovës (IHMK), reshjet më të theksuara pritet të regjistrohen gjatë ditës së martë, ndërsa në viset e larta malore shiu mund të përzihet edhe me borë.

Reshje më të dendura parashihen në zonën e Pejës, ku parashikimet meteorologjike tregojnë sasi më të mëdha të reshjeve, si dhe në Prishtinë, Mitrovicë, Ferizaj dhe Drenas.

Në Prishtinë, temperaturat pritet të lëvizin nga 5 deri në 7 gradë Celsius, ndërsa në nivel vendi temperaturat minimale do të zbresin deri në 0 gradë.

Për Kosovën është në fuqi paralajmërimi i verdhë për reshje shiu. Reshjet mund të shkaktojnë vështirësi në trafik, përmbytje dhe rrëshqitje të dheut në zonat e rrezikuara.

IHMK rekomandon që qytetarët të kenë kujdes gjatë qarkullimit dhe të përdorin veshje më të ngrohta për shkak të rënies së temperaturave.