Aleanca kërkon dorëheqjen e Gërvallës dhe Sveçlës: Strategjia kundër dhunës në familje ka dështuar

Aleanca ka kërkuar dorëheqjen e ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla, duke i bërë përgjegjës për dështimin e Strategjisë Kombëtare për Mbrojtje nga Dhuna në Familje dhe Dhuna ndaj Grave, si dhe për menaxhimin e rastit të Arlinda Zekajt.

Përmes një postimi, Aleanca ka shprehur mbështetje për kërkesën e grave të Kosovës për dorëheqjen e ministres Gërvalla, ndërsa ka kërkuar edhe largimin e ministrit Sveçla, për shkak të, siç e cilëson, menaxhimit fatal të rastit të Arlinda Zekajt.

Sipas Aleancës, dështimi i strategjisë ka përgjegjësi të qartë politike dhe nuk mund të mbetet vetëm në nivelin e zyrtarëve të policisë apo prokurorisë.

Partia ka kërkuar ndryshimin urgjent dhe të plotë të Strategjisë Kombëtare për Mbrojtje nga Dhuna në Familje dhe Dhuna ndaj Grave, duke theksuar se përgjegjësia duhet të shtrihet edhe te drejtuesit politikë.

“Është e papranueshme që të shkarkohen vetëm vartësit, ndërsa përgjegjësit politikë të vazhdojnë të bëjnë sehir, duke mbrojtur një strategji që ka dështuar”, thuhet në reagimin e Aleancës.

Në fund, Aleanca ka insistuar se përgjegjësia për dështimet institucionale duhet të nisë nga nivelet më të larta drejtuese dhe se personat përgjegjës duhet të japin llogari.