Dy të mitur përplasin veturën e Policisë në Skenderaj dhe ikin, arrestohen pas dy ditësh hetime

Policia e Kosovës ka arrestuar dy persona të mitur të dyshuar për incidentin e së shtunës mbrëma në Skenderaj, ku një veturë goditi veturën zyrtare të Policisë, duke shkaktuar lëndimin e dy zyrtarëve policorë.

Sipas njoftimit të Policisë, rasti kishte ndodhur më 24 tetor, rreth orës 21:45, kur një njësi policore gjatë patrullimit kishte vërejtur një veturë me targa vendore duke u drejtuar në mënyrë të rrezikshme.

Gjatë përpjekjes për ta ndaluar, drejtuesi i veturës kishte goditur veturën zyrtare, duke e nxjerrë nga rruga. Vetura policore më pas ishte përplasur me një shtyllë elektrike, ndërsa dy zyrtarët që ndodheshin brenda kishin pësuar lëndime dhe ishin dërguar për trajtim mjekësor.

Vetura e dyshuar ishte gjetur e aksidentuar dhe e braktisur në fshatin Rezallë të Skenderajt.

Pas hetimeve intensive, hetuesit e Sektorit Rajonal të Hetimeve në Mitrovicën e Jugut kanë identifikuar dhe arrestuar dy të miturit, të dyshuar se fillimisht e kishin marrë veturën në mënyrë të kundërligjshme.

Të dyshuarit janë intervistuar në përputhje me procedurat ligjore dhe, me vendim të prokurorit kompetent, janë liruar për t’u proceduar në procedurë të rregullt.

Ad Banner

Ndaj të dyshuarit që drejtonte veturën janë iniciuar raste për veprat penale “Sulm ndaj personit zyrtar” dhe “Marrje në posedim të pasurisë së luajtshme”