KDI ka shprehur shqetësim për mënyrën se si Komisioni për Legjislacion nisi shqyrtimin dhe votimin në parim të pakos së projektligjeve për reformën në drejtësi, raporton GazetaBlic.
Sipas KDI-së, deputetëve u janë dërguar qindra faqe material vetëm një natë para mbledhjes, duke mos respektuar afatin e paraparë në Rregulloren e Kuvendit për thirrjen e komisionit.
KDI thekson se projektligjet u votuan pa praninë e ministres përgjegjëse dhe kërkon që fazat e mëtejshme të shqyrtimit të zhvillohen pa nguti, në përputhje me procedurat parlamentare dhe me përfshirjen e akterëve relevantë.
E plotë:
KDI shpreh shqetësimin që Komisioni për Legjislacion e nisi sot punën e tij me shqyrtimin dhe votimin në parim të pakos së projektligjeve për reformën në drejtësi, në shkelje të dispozitave të Rregullores së Punës së Kuvendit.
Fillimisht, neni 34 (4) i Rregullores përcakton se, përveç rasteve të veçanta, mbledhja e komisionit thirret së paku tri ditë pune para mbajtjes së saj. Në rastin e sotëm, deputetët kanë pranuar pakon e projektligjeve dhe materialet përcjellëse prej qindra faqesh mbrëmë, ndërsa janë ftuar që sot t’i diskutojnë dhe votojnë ato në parim. Për këtë procedim të përshpejtuar nuk është dhënë paraprakisht ndonjë arsyetim.
Për më tepër, Rregullorja, në nenin 74 (1), parasheh që leximi i parë në seancë plenare mbahet vetëm pasi të kenë kaluar dy javë nga shpërndarja e projektligjeve tek deputetët. Pra, Komisioni kishte kohë që ta zhvillonte shqyrtimin në parim duke respektuar afatin e rregullt për thirrjen e mbledhjes dhe duke u dhënë deputetëve mundësi reale për t’i shqyrtuar materialet.
Projektligjet u votuan gjithashtu pa u prezantuar nga ministrja përgjegjëse. Edhe pse kjo lidhet me praktikën parlamentare dhe jo me një detyrim procedural, për një pako kaq të rëndësishme të reformës në drejtësi do të duhej që ministrja të ishte e pranishme, t’i prezantonte propozimet dhe t’u përgjigjej pyetjeve eventuale të deputetëve.
KDI i konsideron këto projektligje tejet të rëndësishme për avancimin e integritetit, performancës dhe llogaridhënies në sistemin e drejtësisë. Pikërisht për këtë arsye, procedimi i tyre duhet të bëhet pa nguti dhe në përputhje të plotë me Rregulloren e Kuvendit.
KDI pret që Komisioni për Legjislacion, i cili është përgjegjës për të garantuar zbatimin e drejtë të Rregullores së Kuvendit, t’i zhvillojë fazat e mëtejshme të shqyrtimit të kësaj pakoje duke respektuar plotësisht procedurat parlamentare dhe duke siguruar përfshirjen e akterëve relevantë.
