Nesër nis hetimi parlamentar për vrasjen e Arlinda Zekajt, Rexhepi tregon çfarë do të hetohet

Komisioni Hetimor Parlamentar për rastin e vrasjes së Arlinda Zekajt do të mbajë nesër, në orën 11:30, mbledhjen e parë në Kuvendin e Kosovës.

Nënkryetarja e Kuvendit, Emilia Rexhepi, e cila është pjesë e këtij komisioni, ka bërë të ditur se do të shqyrtohen të gjitha rrethanat që i paraprinë vrasjes, me fokus të veçantë në veprimet e institucioneve dhe mënyrën se si është trajtuar rasti.

“Do të duhet të konfirmojmë të gjitha rrethanat që i kanë paraprirë vrasjes së Arlindës. Numri i vrasjeve të grave tona është shumë i madh dhe kjo tregon se ne, si shoqëri në tërësi, kemi probleme me të cilat duhet të përballemi”, ka deklaruar Rexhepi në emisionin “Info Magazine” në Klan Kosova.

Ajo ka theksuar se komisioni do të përpiqet të kuptojë nëse ka pasur pengesa apo dështime institucionale gjatë trajtimit të rastit.

“Do të japim maksimumin tonë që të shohim se si po shkon hetimi lidhur me rastin e Arlindës dhe të kuptojmë nëse institucionet, ndoshta diku, janë bllokuar në këtë proces”, është shprehur Rexhepi.

Komisioni, i kryesuar nga Burim Ramadani dhe i përbërë nga përfaqësues të të gjitha partive politike, pritet të nisë nesër punën për zbardhjen e përgjegjësisë institucionale në rastin e Arlinda Zekajt.