Opinionisti Arbër Vllahiu, ka kritikuar performancën e Qeverisë së Kosovës, duke e cilësuar negativ Raportin e BE-së për vendin, të hartuar nga Komisioni Evropian, dhe duke thënë se në shumicën e fushave vendi ka shënuar dështim.
Vllahiu në emisionin Rubikon të Klan Kosova, ka rikujtuar se Qeveria e Albin Kurtit erdhi në pushtet në vitin 2021 me premtimin për shpresë dhe ndryshim, por sipas tij, përfundoi si qeveri e mungesës së shpresës dhe ndryshimit.
“Si është e mundur që kjo qeveri që ka ardhur në vitin 2021, si qeveri e shpresës dhe ndryshimit, të dalë në qeverinë që është e pashpresës dhe mosndryshimit?”, u shpreh Vllahiu.
Ai tha se Raporti i Progresit duhet të pranohet si rezultat i punës së institucioneve të Kosovës, pasi gjatë hartimit të tij, sipas tij, janë përfshirë edhe institucionet, shoqëria civile dhe grupet e interesit.
